ელექტროტრავმების მიზეზი შესაძლოა იყოს სპონტანური ატმოსფერული ელექტროობის (ელვით გამოწვეული დაზიანებები) ან საყოფაცხოვრებო და სამრეწველო ელექტროენერგიის ზემოქმედება (ელექტროტრავმა). ელექტროდენი ორგანიზმში მოხვედრისას წარმოქმნის სითბოს, რომელიც წვავს და აზიანებს, როგორც შინაგან ქსოვილებს, ასევე კანს. ელექტროდენის დარტყმამ შეიძლება დაარღვიოს ორგანიზმში არსებული ელექტრული მუხტების ნორმალური მოქმედება (გამოიწვიოს ე.წ. "მოკლე ჩართვის" მსგავსი მოქმედება), რაც გამოიხატება ნერვული დაბოლოებების მიერ იმპულსების გადაცემის შეწყვეტით ან არასწორი გადაცემით. იმპულსის არასწორ გადაცემას შეუძლია იმოქმედოს:

• კუნთებზე – გამოიწვიოს მათი უნებლიე და ძალიან ძლიერი შეკუმშვა;

• გულზე – გამოიწვიოს გულისცემის შეწყვეტა (გულის გაჩერება);

• თავის ტვინზე – გამოიწვიოს გულყრა, ცნობიერების დაკარგვა ან სხვა დარღვევები.