მოზარდები ინჰალატორებს იყენებენ უფრო ხშირად, ვიდრე კოკაინს ან LSD-ს, მაგრამ ნაკლები სიხშირით, ვიდრე მარიხუანას და ალკოჰოლს. ამერიკის შეერთებულ შტატებში მოზარდების თითქმის 10% ისუნთქავს გამხსნელებს. ინჰალატორები განსაკუთრებულ პრობლემას წარმოადგენს 12 წლის და უფრო მცირე ასაკის ბავშვებში. ინჰალატორები შეიძლება ინახებოდეს ბევრ ოჯახურ პროდუქტში, ამდენად, ბავშვებმა და მოზარდებმა ადვილად შეიძლება მოიპოვონ აღნიშნული პროდუქტები.

პროდუქტი შეიძლება ჩაასხან ცელოფნის პარკებში და შემდეგ იქიდან შეისუნთქონ (შესრუტვა ცხვირიდან ან პირიდან), ან პროდუქტით გაჟღენთილი ნაჭერი დაიდონ ცხვირთან ან ჩაიდონ პირში.

სიმპტომები

მომხმარებელში სწრაფად ვითარდება ინტოქსიკაცია. მათ შეიძლება დაეწყოთ თავბრუხვევა, ძილიანობა და დაბნეულობა, მეტყველება გაუხდეთ გაურკვეველი. მათ უჭირთ ფეხზე დგომა და სიარული. აღენიშნებათ არამყარი სიარული. მომხმარებლები შეიძლება აღგზნებულები გახდნენ, მაგრამ არა იმიტომ, რომ გამხსნელები წარმოადგენს მასტიმულირებელ საშუალებას. მოგვიანებით შეიძლება დაირღვეს რეალობის აღქმისა და შეგრძნების უნარი, რაც იწვევს ილუზიებს, ჰალუცინაციებსა და მოჩვენებებს. ისინი შეიძლება გახდნენ მშფოთვარე და დაბნეულები, გამოუვლინდეთ ხასიათის ცვალებადობა. მათ უქვეითდებათ აზროვნებისა და კოორდინაციის უნარი. ინტოქსიკაცია შეიძლება გაგრძელდეს რამდენიმე წუთიდან 12 საათზე მეტხანს.

სიკვდილი შეიძლება სწრაფად მოხდეს ამ პროდუქტების პირველი ინჰალაციის დროსაც კი, ვინაიდან ამ დროს სუნთქვა იშვიათდება და ზერელე ხდება, ირღვევა გულის რიტმი (არითმია).

ქრონიკული გამოყენების შემთხვევებში, ადამიანები ხდებიან ტოლერანტულები გამხსნელების ზემოქმედებისადმი. შეიძლება განვითარდეს მათზე დამოკიდებულება, რასაც თან ახლავს გამხსნელების განმეორებითი მოხმარების გაზრდის ძლიერი მოთხოვნილება. ფიზიკური დამოკიდებულება ასეთ შემთხვევებში არ ვითარდება. გარდა ამისა, მედიკამენტების მიღების შეწყვეტა არ იწვევს უსიამოვნო სიმპტომებს (მოხსნის სინდრომი).

გამხსნელების ქრონიკულმა მოხმარებამ ან მათმა მუდმივმა მოხმარებამ (მაგალითად, სამუშაო ადგილებზე) შეიძლება გამოიწვიოს ტვინის, გულის, თირკმლების, ღვიძლისა და ფილტვების მძიმე დაზიანება. გარდა ამისა, შეიძლება დაზიანდეს ძვლის ტვინი, დაქვეითდეს სისხლის წითელი უჯრედების გამომუშავება და შემდეგ განვითარდეს ანემია.

მკურნალობა

ინჰალატორების მომხმარებელი ბავშვებისა და მოზარდების მკურნალობა მოიცავს სხვადასხვა ორგანოს შესაძლო დაზიანების შეფასებას. დახმარების გაწევა შესაძლებელია განათლებით და კონსულტაციებით, რომ გაუმჯობესდეს მენტალური ჯანმრთელობა და სოციალური უნარ-ჩვევები, აგრეთვე, სოციალურ პრობლემებთან გამკლავების უნარი. მომხმარებლების უმეტესობა თავს ანებებს ამ მედიკამენტების გამოყენებას მოზარდობის პერიოდის დამთავრების შემდეგ.